တိုးဝှေ့ ဝင်လာတဲ့ လေသံသဲ့သဲ့
နားစည်မှာ တီးတိုးစွာရိုက်ခတ်
တရားသံလား မုဆိုးသံလား
အယဥ်လား အရိုင်းလား
အရေခြုံထားတဲ့ စကား
တရားနောက်က ပစ်လိုက်တဲ့ မုဆိုးစကား။
.
ကလိမ်စေ့ကို ငြမ်းဆင်လို့
ဘုရားတည်ပြတဲ့ ပြယုဒ်
အပွေးမြင်ရုံနဲ့ အပင်မသိနိုင်ဘူး
မိစ္ဆာမြားဟာ အဆိပ်ပြင်းလို့
ဖြူစင်သူတွေ အတုံးအရုံးကျရှုံးရတယ်။
.
မြန်မာဟာ နှစ်ပိုင်းကွဲသွားတယ်ဆိုရင်
တဖက်က ငရဲ၊ တဖက်က နတ်ပြည်
အလင်းနဲ့ အမှောင်၊ ယင် နဲ့ ယန်
ဘယ်ဖက်ခြမ်းမှာ နေကြမလဲလို့
ရွေးချယ်ခွင့် ပေးခဲ့ရင်
"မင်းတပ်” ကလူတွေ ရီကြလိမ့်မယ်
"အထက်အညာ"ကလူတွေ ရီကြလိမ့်မယ်
အရိုးပြာပုံဖြစ် ချောင်းမှာသွေးစီးလို့
"သေသော်မှတည့် သြော် ကောင်း၏" ဆိုတဲ့
ရွေးချယ်တဲ့လမ်း ရှောက်လှမ်းသူကို
လှမ်းမျော်ကြည့်ရင်း သိမ်ငယ်မိသည်။
.
လောကဓံလည်း နောကျေလို့
ရီသံနောက်က ငိုသံတွေ
ငိုသံနောက်က ရီသံတွေ
ခွဲခြားကြည့်ရင်း
နားထောင်မိတယ်
တရားနောက်က မုဆိုးစကား။
No comments:
Post a Comment