လိုမိုဂရပ်ဖီ( Lomography )

လိုမိုဂရပ်ဖီ(Lomography) အကြောင်း မြန်မာပြည် စာဖတ် ပရိတ်သတ် သိသူနည်းကြလိမ့်မယ် ထင်တာနဲ့ သိအောင်၊ ပြီးတော့ လိုမို ကင်မရာတွေ အကြောင်း တစေ့တစောင်းအပြင် လိုမိုကင်မရာတွေနဲ့ ရိုက်ထားတဲ့ ပုံတွေ တွေ့ဖူး မြင်ဖူးအောင်လို့ ဆိုပြီး ရေးဖို့ အကြံဖြစ်လာတာပါ။

ဓါတ်ပုံပညာရပ် အကြောင်း ရေးသည့် အကြောင်းအရာ မဟုတ်သည့် အတွက် လူတန်းစားအားလုံး နားလည်စေသည့် အသုံးအနှုန်းများသာ ရေးထားလေသည်။

ကိုယ်ကိုယ်တိုင် လည်း လိုမိုဂရပ်ဖီ အကြောင်း သိလာတာ လွန်ခဲ့တဲ့ ခုနစ် နှစ်ကျော် ၊ ရှစ်နှစ် လောက်တုန်းကပါ။ အဲဒီတုန်းက ဒီ လိုမိုအကြောင်း စိတ်ဝင်စားသူတွေ အလွန်နည်းသေးတယ်။ ပြီးတော့အဲဒီ အချိန်အခါတုန်းက လိုမိုကို ရိုက်ပြီးရင် ရိုးရိုး ဓါတ်ပုံဆိုင်တွေမှာ ကူယူ ပုံတွေ ထုတ်လို့မရဘူး။ ဘာလို့လဲဆိုတော့ လိုမိုကင်မရာက ရိုးရိုး ဓါတ်ပုံဖလင်ကို အသုံးပြုထားခြင်း မဟုတ်ပဲ၊ သီခြား လိုမိုဖလင်ကို အသုံးပြုထားတာဖြစ်တယ်။

လိုမိုဖလင်ကို ပုံထုတ်ချင်တယ်ဆိုရင် ဖလင်လိပ်ကို စာတိုက်ကနေတဆင့် ပုံကူယူပေးတဲ့ ဆိုင်ဆီကို ပို့ပေးရတာ။ လိုမိုဖလင်လိပ် ဝယ်မယ်ဆိုရင်လည်း အင်တာနက်က မှာရတာဆိုတော့ လူထုလူတန်းစားတွေအားလုံးထဲကို ထဲထဲဝင်ဝင် အလွယ်တကူ ရောက်မလာသေးဘူးပေါ့။

ဒါပေမယ့် အခုနောက်ပိုင်း ထုတ်လာတဲ့က လိုမိုကင်မရာတွေကတော့ ရိုးရိုးဖလင်တွေနဲ့လည်း အသုံးပြုလို့ ရပါတယ်။ စာရေးသူ အသုံးပြုသော Yasuhara T981 (Kinkakuji Gold Edition) http://shop.lomography.com/yasuhara/t981.html ကင်မရာသည် လိုမိုကင်မရာ တစ်ခု
မဟုတ်ပေမယ့် လိုမိုကင်မရာ ထုတ်လုပ်သည့် အဖွဲ့အစည်း၌သာ ဝယ်ယူရရှိနိုင်သော ကင်မရာအမျိုးအစားဖြစ်သည်။ ထုတ်လုပ်စဉ်က အလုံးရေ ငါးဆယ်သာ ထုတ်လုပ်ခဲ့သည့် အတွက် ယခုအချိန်တွင် ထိုကဲ့သို့ ကင်မရာမျိုးအား ဝယ်ယူ၍ မရနိုင်တော့ပေ။

(လိုမိုပုံ မဟုတ်ပါ)

ဂျပန်နိုင်ငံ ကျိုတိုမြို့ရှိ ကင်ကဂုချိ ဘုရားကျောင်း(Kinkakuji Temple) သို့ စာရေးသူ ရောက်စဉ်က ထိုဘုရားကျောင်း၏ အနုပညာမြောက်ပုံ၊ အေးချမ်းတည်ငြိမ်ဟန်တို့က စာရေးသူအား အလွန်စွဲဆောင်ပါသည်။ ယခု Yasuhara T981(Gold Edition) ကင်မရာသည် ထို ကင်ကဂုချိ ဘုရားကျောင်းကို ရည်စူး ထုတ်လုပ်ထားသည်။

ဒီ လိုမိုကင်မရာတွေနဲ့ လိုမိုဂရပ်ဖီ နည်းပညာတွေကို စတင်ခဲ့တာက သြစတီယား(Austria) နိုင်ငံ လိုမိုအဖွဲ့အစည်းမှ ဖြစ်ပါသည်။ လိုမိုဆိုသည့် အမည်သည် ပထမ ကမ္ဘာစစ်အတွင်း သေနတ်ပစ် မှန်ပြောင်းများ ထုပ်လုပ်သော ရုရှား(Russia) နိုင်ငံမှ လိုမို ကုမ္ပဏီကို အစွဲပြုလျက် မှည့်ခေါ်ခဲ့ခြင်းဖြစ်သည်။

ဒီနေရာမှာ လိုမိုကင်မရာနဲ့ ရိုက်ပြီး ထုတ်ထားတဲ့ ပုံတွေကို ဓါတ်ပုံ(Photo) လို့ မခေါ်တော့ဘူး။ လိုမို(Lomo) လို့ပဲ ခေါ်ဝေါ် သုံးစွဲတယ်။ ဒီအသုံးအနှုံးကို စတင်သုံးစွဲ့လာကြတာလည်း သိပ်ပြီးတော့ မကြာကြသေးဘူး။ လွန်ခဲ့တဲ့ ကိုးနှစ်၊ ဆယ်နှစ်လောက်ကပဲ။ လိုမိုကင်မရာတွေကို စတင် တီထွင်ရောင်းချခဲ့တဲ့ လိုမို အဖွဲ့အစည်းကပဲ စတင် သုံးစွဲခဲ့ကြတာ။

မြန်မာစကားမှာ ဖိုတို(photo) ဆိုတဲ့ အင်္ဂလိပ်စာလုံးအတွက် ဓါတ်ပုံဆိုတဲ့ ဝေါဟာရ ရှိတယ်။ လိုမို(Lomo) ဆိုတဲ့ စာလုံးအသစ်အတွက်တော့ မြန်မာဝေါဟာရ မရှိသေးဘူး။ အင်္ဂလိပ်စကားလုံးကို မွေးစာသမှုပြုပြီး လိုမိုလို့ပဲ ခေါ်ရမလား၊ ဓါတ်ပုံလို့ပဲ ဆက်လက် ခေါ်ဝေါ်သုံးစွဲကြမလားဆိုတာ ဒါက ခေတ်ကာလ လူအဖွဲ့အစည်း လူတွေ လက်ခံကျင့်သုံးလာမဲ့ အပေါ်မူတည် သလို၊ ဘာသာစကားတွေ တဖြည်းဖြည်းနဲ့ ပြောင်းလဲသွားပုံတို့နဲ့လည်း ဆိုင်မှာပေါ့။

လိုမိုဂရပ်ဖီ ဆိုတာက လျှပ်တပြက်ရိုက်တဲ့ ပုံတွေ၊ နေ့စဉ် ရိုးရိုး သာမန် အဝတ်အစားတွေနဲ့ လူတွေ သွားလာလှုပ်ရှားပုံတွေ၊ အရောင်းအသွေးစုံတဲ့ အဆောက်အဦးပုံ တွေကို ဦးစားပေးလေ့ရှိသည်။ လိုမိုပုံတွေကို ကြည့်လိုက်ရင် အရောင်အသွေး စိုစိုပြေပြေနဲ့ တောက်ပနေလေ့ရှိပြီး၊ အိပ်ဇ်ပိုရှာ(exposure) လည်း မျှတရန် မလို၊ ပုံထဲတွင် ပါဝင်သော အရာများ(objects) သည်လည်း တခါတရံ ဝေဝါးနေတတ်သည်။





လိုမိုပုံများသည် မမျှော်လင့်ပဲ ရုတ်တရက် ချက်ကောင်းကို ယူပြီး လျှတ်တပြက် ရိုက်လိုက် သကဲ့သို ထင်ရကာ ပုံအရိုက်ခံရသူ၊ သို့မဟုတ် ရိုက်လိုက်သူ၊ သို့်မဟုတ် ပြင်ပမှ ကြည့်ရှု့ခံစားသူအနေဖြင့် "ဟာ..ဒီပုံလေး ရိုက်ဖြစ်လိုက်သလား .. ရိုက်မိလိုက်သလား...ကောင်းတယ်" ဟုပြောရလောက်အောင် ပျော်ရွှင်မှုပေးနိုင်လေသည်။

လိုမိုကင်မရာကို အသုံးပြုသူများအနေဖြင့် ခက်ခဲသော ဓါတ်ပုံပညာရပ်များ အကြောင်း စဉ်းစားသိရှိရန် မလို။ ရိုးရှင်းသော ပကတိစိတ်ဖြင့်သာ မိမိ စိတ်ကူတည့်ရာ အတိုင်း နေ့စဉ် ဖြစ်ပျက်လေ့ရှိသော မြင်ကွင်းများ၊ ပတ်ဝန်ကျင်၊ ရှု့ခင်း၊ လူများ လှုပ်ရှားသွားလာဟန်များကို လွယ်ကူ လျက်မြန်စွာ မှတ်တမ်းတင်ရုံပင်ဖြစ်သည်။ ထို့အပြင် လိုမိုကင်မရာများသည် အလွန်အားနည်းသော အလင်ရောင်ရှိသည့် အနေအထားများအောက်တွင် ပုံများကို ရိုက်ယူလို့ ရသည်။

လိုမိုဂရပ်ဖီ၏ ဆောင်ပုဒ်သည် "မစဉ်းစာနဲ့၊ ရိုက်လိုက်ပါ" ဟုဆိုထားသည်။ ဆိုသည့်အတိုင်း မိမိတို့ မျက်စိအောက်တွင် ရောက်လာသော မြင်ကွင်း၊ အရာဝတ္ထုမှန်သမျှ တွေမြင်သည့် အတိုင်း ပုံများကို ရိုက်ယူလို့ ရပါသည်။ လိုမိုကင်မရာ အမျိုးအစား အများစု၏ မှန်ဘီလူး(Lens) များသည် ထူးခြားသော ရိုက်ချက်များ၊ ဆန်းသစ်သော အရောင်သက်ရောက်မှုဖြင့် ပုံများရရှိစေရင် ထုတ်လုပ်ထားပါသည်။

အချို့သော ဓါတ်ပုံပညာရှင်များက လိုမိုကင်မရာ အချို့၏ မှန်ဘီဘူးများ စွမ်းဆောင်နိုင်ချက်ကြောင့် ရလာသည် ပုံများသည် အဆန်းမဟုတ်။ ကွန်ပျုတာ ဂရပ်ဖစ် ဆော့ဖ်ဝဲ(Graphic Software)များ အသုံပြုကာ ကွန်ပျုတာနည်းပညာဖြင့် ဖန်တီးယူ၍လည်း ရနိုင်သည်ဟု ဆိုကြသည်။

ဒီဂျစ်တယ် ကင်မရာများ ခေတ်စားနေချိန်တွင် လိုမိုအဖွဲ့မှ ရိုးရိုးဖလင်ကိုသာ အသုံးပြုသော ခေတ်ဟောင်းမှ ပုံစံများကို အခြေခံကာ ဒီဇိုင်းဆန်းသည့် ကင်မရာများကို အောင်မြင်စွာ ထုတ်လုပ်ရောင်းချလျက်ရှိနေသည်။

လိုမိုကင်မရာများသည် မှန်ဘီလူး တစ်ခုမှ လေးခုအထိပါသည့် အမျိုးအစားများ မျိုးစုံရှိသည်။ မှန်ဘီလူး လေးခုပါသော လိုမိုကင်မရာသည် ဖလင်တကွက်ထဲအတွင်း ပုံရိပ်လေးမျိုး ထုပ်လုပ်ပေးနိုင်စွမ်းရှိသည်။





တစ်ခုတော့ ရှိသည်။ ဖလင်ကင်မရာဖြစ်သည့် အတွက် ဖလင် တစ်လိပ်လုံးကုန်မှ ထိုဖလင်လိပ်ကို ကူးဆေးကာ မိမိရိုက်ထားသော ပုံများကို ကြည့်နိုင်လေသည်။ ဒီဂျစ်တယ် ကင်မရာဆိုရင်တော့ ခုရိုက် ခုကြည့် ၍ရသည်။






အနန္တမေတ္တာဖြင့်
ဘကောင်း